13 NIENDE WAPI? ‘’Dunia imenichukia’’

 NIENDE WAPI? ‘’Dunia imenichukia’’

 IMELETWA KWAKO NA SIMULIZI MIX ENTERTAINMENT                      

 ZUBERY RAZUUR MAVUGO.

    SEHEMU YA KUMI NA TATU.

ILIPOISHIA:

       ‘’ Jamani polisi wanakuja, tukimbieni, tusije kamatwa.’’ Aliropoka, sauti yake ilisikika na hivi sasa raia walimsahau mwizi wao na kuanza kukimbia. Ndani ya sekunde kadhaa eneo lile lilibaki jeupe halina mtu isipokuwa Mashaka pekee. Hapo akawa amefanikisha adhma yake, akawaza nini afanye kwa mtoto huyo ambaye alikuwa amepigwa sana. Hakuona mtu yeyote aliyeonesha kumjali, hivyo akaamua kulisimamia jambo lile zima mwenyewe.

ENDELEA... Ingawa alikuwa amevalia mavazi mazuri ambayo nd’o kwanza yalikuwa katika hali yake ya upya, lakini bado moyo wake wa huruma uliyomuingia haukujali hilo. Ni kama aliihisi damu iliyotapakaa mwilini mwa mtoto yule ikiwa kama maji, hapo akambebelea mtoto yule mikono miwili. Alikatiza barabarani mbiombio, watu wakimshuhudia na kumgeuza kama sinema wala wasiwe msaada kwake. Hakujali ni jinsi gani wanaweza kumfikiria, alichojali ni jinsi gani anaweza kuyaokoa maisha ya mtoto yule ambaye hakuwa hata akijielewa.

     Miguu yake ilimpeleka hadi kwenye kituo cha tiba ambacho kilikuwa karibu yake, huko akapokelewa yeye pamoja na mgonjwa wake.

      ‘’ Dokta naomba mumsaidie, hali yake ni mbaya sana... Msaidieni kwanza.’’

      ‘’Nijukumu letu, usijali.’’

Mgonjwa alipokelewa na kupewa kitanda, kisha matibabu yakaanza.

  Walijitahidi kadri ya uwezo wao kuyaokoa maisha ya mtoto yule. Vyeti vyao havikuwa lolote wakati huo, mavazi yao hayakuwa chochote wala ujuaji wao wa kushauri watu haukuwa na maana, walichofanya ni kuhakikisha wanatumia taaluma yao kuunusuru uhai wa mtoto yule kama ambavyo walivyojifunza.

  Hata hivyo jambo lile halikuwa la dakika mbili ama tatu. Ni jambo lililochukuwa muda. Baada ya kufanya waliyoyajua wenyewe tayari walimwacha na dripu ya maji pamoja na nyingine ya damu wakati huo hakuwa hata amezinduka mtoto yule.

   ‘’ Inabidi uende nyumbani, utakuja kumtazama kesho maana mpaka hivi sasa bado haturuhusu yeyote kumuona.’’

    ‘’ Lakini dokta, mimi ni ndugu yake, siwezi kumdhuru.. Kama mnafikiri labda ikienda kumwona naweza mdhuru...’’

    ‘’ Hatuna maana hiyo, tunapokwambia umwache mgonjwa apumzike, hayo ni mambo yakitaalamu zaidi, hivyo ni vyema kufuata ushauri wa kitaalamu.’’

  Hapo bwana Mashaka alielewa na kuamua kuondoka kwenye kituo kile cha tiba. Ingawa alikuwa na wasiwasi kuhusu hali aliyoiacha kule kazini kwake, lakini alijikuta akijiondoa wasiwasi baada ya kukumbuka kuwa; wakati anaenda kupata chakula aliacha amefunga vizuri. Hapo kidogo pumzi nzito ikamuijia.

  Alitembea kwa miguu hadi nyumbani kwake, si kwamba hakuwa na pesa bali damu iliyokuwa imetapakaa mwilini mwake nd’o hiyo iliyokuwa sababu ya yeye kutembea kwa miguu. Hata alipofika nyumbani, alimstaajabisha na kumwogopesha mkewe.

   Wakati anafungua mlango kidogo mkewe akimbie, akidhani huenda moja kati ya mizimu imeamua kulisaliti kaburi na kuingia ndani mwake, lakini mumewe alimuhakikishia kuwa yeye ndiye. Maswali kama umekuaje hadi ukawa hivi? Hayakumsumbua sana Mashaka maana aliyajibu kama mwenye kutafuna bigi ji. Hata alipomaliza alielekea maliwatoni na kujisafisha huku ngu zile mpya akizifua hukohuko. Damu iliyoganda kwenye nguo zile haikuweza kuliheshimu povu alilolitumia, wala hazikuweza kuyatii maji aliyoyatumia zaidi ni kama ziliidharau mikono aliyokuwa akiitumia kufikinyia. Hapo maudhi yakampata, akamwita mkewe.

   ‘’ Nafua lakini hazitakati... Kwanini madoa hayaishi?’’

    ‘’ Hahahaha... Unaweza kujua kufua lakini usijue mitindo ya kuifanya nguo itakate. Kufua sio fani ya mwanaume, wacha kesho nitakutakatishia.’’

   ‘’ Mh! Ama kweli kila shetani na mbuyu wake.’’

    ‘’ Na kila kichwa na mwili wake.’’

     Kikatoka kicheko cha istihizai. Hapo wakarejeshana ndani ya michezo yao ya kitoto. Wakaanza kucheka na kutaniana.

 Hata muda wa kulala ulipofika, kila mmoja alilitekeleza jukumu lile kwa manjonjo yote na majigambo yote pasina hofu. Usingizi uliwachukuwa na wasijielewe.

  ***

 Asubuhi ya siku hiyo ilikuwa ni asubuhi na uasubuhi wake haswa. Jua lilitumbua macho yake utadhani halijawahi kuiona dunia, anga ilimeremeta utadhani imetolewa posa, kitendo kilico ipelekea asubuhi hiyo kupendeza haswa.

 Kama ilivyoada mke alikuwa tayari ameshaamka tangu kitambo, huku mume naye akiwa ameamka ingawa hakuwa amemtangulia mkewe.

 Harakati zote zilipomalizika, mumewe aliomba ruhusa nakuondoka zake kuelekea majukumuni. Hata hivyo, hakupitiliza moja kwa moja majukumuni bali alipitia hspitali kwa ajili ya kumjulia hali mgonjwa wake.

 Huko hakukaa sana maana bado taarfa zilikuwa kama za siku iliyopita, kwamba; hauwa amezinduka hivyo asingeweza kuonana naye. Hakuhitaji kusumbuana na madktari, akaichukuwa miguu yake na moja kwa moja akaelekea kazini kwake.

       ***

Kadri alivyozidi kujilazimisha yafumbua macho yake ndivyo alivyozidi kuyahisi ni mazito huku yakimuuma. Hiyo haikuwa sababu ya yeye kutojilazimisha kuyafumbua, hata alipofanikiwa bado alikabiriwa na mwanga mkali ambao ni kama macho yake hayakuwa yameupata kwa muda; mwanga ule ulimpelekea ayafumbe macho yake kwa mara ya pili, huku akiiomba akili msaada wa kufikiri ni kwanini yupo katika hali ile?

 Hakukoma king’ang’anizi, akayafumbua macho yake kwa mara ya pili, hapo akakutana na nuru, akaipokea nuru ile kistaarabu iliasiyakorofishe macho yake kama alivyofanya awali. Kwa mbali akaanza kuona kama yumo ndani ya chumba, ingawa mwanzoni ilimuwia vigumu kutambua kama yumo ndani ya chumba, lakini alipotambua alijikuta akikumbwa na maswali ndani ya kichwa chake.

   Niko wapi hapa? Na kwanini niko hapa? Akapata wazo la kunyanyuka, wakati anataka kunyanyuka mara akahisi kitu kama kamba kwenye mkono, ikabidi atazame, hapo ndipo alipouona mrija wa dripu kutazama juu akaiona dripu ya maji ikimcheka na kumwambia kimafumbo kuwa, ni yeye aliyeyatumia maji yote yaliyokuwemo ndani ya dripu ile na hata kubakiza machache ambayo yalikuwa yakiendelea kuingia mwilini mwake.

  Nimepatwa na nini? Hata kabla hajakumbuka chochote, akaanza kuyahisi maumivu mwili mzima. Zaidi kichwa kikaanza kumgonga, hapo akakosa jinsi, ikabidi akirejeshe kichwa chake kitandani kwani kilikuwa kikimgonga sana.

  Katika hali ya utulivu wake, ndani ya dakika kadhaa ndipo kumbukumbu zilianza kumrejea, akakumbuka mara ya mwisho kabla hajawa kwenye hali ile, alipokea kipigo cha haja kutoka kwa raia.

   Mbona nipo hapa? Ina maana kuna mtu gani aliyeniokoa? Hapo akaendelea kukumbuka kwa kinazaidi kwamba, wakati akiwa chini kipigo cha raia kikimuendelea, aliweza kusikia sauti ya mtu mmoja kwa mbali kabla fahamu zake hazijamwondoka; sauti ile ilikuwa ni yakuwataarifu wale wapigaji wakimbie kwani polisi walikuwa wamefika.

  Akh! Ina maana kumbe hapa nilipo ninatibiwa na ma afande? Swali hilo lilipita kichwani mwake. Akazikumbuka vyema roho za ma afande zilivyo na ukatili, akayafikiria mateso ya mahabusu. Akawawaza mbu wenye roho mbaya, ambao wanasifa ya kuwinda kuliko simba. Akayafikiria marungu ya maafande.

  Hakuna, haiwezekani, akili yake ikasema kisha hapohapo bila hata kuuliza. Akajinyanyua pasina kujali maumivu aliyokuwanayo. Akachomoa mrija wa dripu na hapo akajilazimisha kutembea hivyohivyo kwa taabu ilimradi atoke ndani mule. Kujilazimisha kwake kuliweza kumfanya ajikute akitonesha vidonda vibichi vilivyokuwa mwilini mwake na kumfanya apate maumivu haswa.

 Hivi sasa aliufikia mlango, alifanikisha kuufungua na kuanza safari yakutoka ndani ya chumba kile alichokuwemo. Akiwa njiani, huku akitegemea usaidizi wa ukuta katika kutembea, alijikuta akiishiwa nguvu zaidi kitendo kilichompelekea aanguke chini kama mzigo na kujitonesha zaidi, hapo akajikuta akipiga makelele kutokana na maumivu aliyoyapata kufuatia tukio lile alilokuwa akilifanya.

      ITAENDELEA.